Babini Dua

SUDAH babulan-bulan ini Palui kada mangawan ka gardu runda atawa ka warung pakacil Isul. Asa kaganangan jua kakawalannya nang kaya Garbus, Tulamak wan tuhirang. Asa ada nang kurang ujar bubuhannya.

Aku ada jua mandangar habar angin bahwa sudah sabulan ini Palui kawin lagi, ujar Tulamak.

Kalu habar itu bujur artinya Palui ganal hampadal wani malawan bini, kada kaya bubuhan kita ini samunyaan takluk wan bini ujar Tuhirang.

Kalu aku kadanya wani atawa kada wani wan bini tapi nang kupikirakan kaya apa mambarimakaninya. Apalagi ujar urang bila babini dua itu banyak bakaramput, ka anu nang tuha bapadah lain, ka anu nang anum kaya itu jua. Jadi saban hari baulah dosa, sahut Garbus.

Kada lawas imbah bubuhannya mamander Palui, mancungul inya kaluar matan higa warung sambil baucap assalamualaukum......

Panjang umur ikam Lui ai, hanyar kami mamander ikam nang sudah babulan-bulan hinip kada saling kaluaran. Bujurkah Lui ikam hanyar kawin pulang, babini anum, ujar Garbus batakun.

Kabalujuran ada nang hakun dimadu wan biniku hakun haja karna inya handak mandapat anak, maklumlah biniku itu mandul sahut Palui.

Nyaman ai baisi pahumaan mandua buting ujar Tulamak. Aku kada tahan jua karna inya sama-sama minta adil, makanya balum sabulan sudah asa pagat pinggangku, sahut Palui.

Kalu kaya itu kami handak minta ilmunya supaya nyaman kaya ikam itu Lui ai, ujar Tuhirang.

Baiknya jangan ditiru wan jangan diumpati gawianku nang sudah talanjur ini, nyaman dilihat sakit manyandang, ujar Palui.

Napa sakitnya Lui, dua rasa, dua alam, ujar Tulamak. Ini nah.... lihat kapalaku, lungur sabukuan sahut Palui sambil mambuka kupiahnya. Kanapa maka lungur Lui, apakah bapusut wan kapala manggawinya, ujar Garbus.

Bini anumku katuju banar mancabutiakan hubanku, tapi bini tuha malah sabaliknya katuju banar mancabuti rambutku hirang, maka ahirnya lungur sakapalaan ujar Palui sambil takuringis kapadihan kana paluh.

Kalu kaya itu kami kada jadi manuruti ikam Lui ai, biar baisi bini saikung bila handak jua marasani dua pahumaan tapaksa ai bagamat manukar nang bakikiloan haja, ujar Garbus sambil mangalangkang tatawaan

Read more »

Mengurangi Ruku

SUDAH samingguan ini batuk Palui kada saling ampihan. Sudah jua dikinumi bamacam-macam ubat matan nang babantuk tablet atawa nang sirup, tapi jaka pang babaik malah kuhul-kuhulnya makin baracap.

“Makanya abahnya ai kurangi baruku,” ujar bini Palui nang tahu lakinya itu bilang sambung puting baruku.

“Kada maraga ruku umanya ai, batukku ini ujar mantri karna alergi wan angin. Kada kawa kana angin sadikit haja, lalu bamula pulang batukku ini,” sahut Palui.

“Alergi wan angin nangapa? Satiap pian tuntung baruku pasti kada sa-apa langsung kuhul-kuhul,” ujar bini Palui. “Mulai isuk aku buangi ruku sisimpanan sampiyan di lamari itu,” ujar bininya maancam.

“Ayu ja umanya ai, mulai isuk aku cubai kada baruku lagi,” ujar Palui bajanji.

Isuknya Palui bujur-bujur kada baruku sama sakali. Hari partama kawa haja inya manahan. Kaya itu jua hari kadua inya masih kawa jua manahan walau muntungnya kada saling ampihan mangunyut gulaan. Tapi wayah hari katiga inya sudah kada kawa manahan lagi. Apalagi wayah inya batamuan wan kakawalannya nangkaya Garbus wan Tulamak nang sama-sama hantu ruku jua lipus-lipus wan asap ruku, maka kacar tu pang liurnya handak baruku jua.

“Bus.. ui Garbus baiknya pang balang kutak ruku ikam itu, ruku hanyar kah?” ujar Palui managur Garbus nang tating-tating wan ruku.

“Hi-ih, ruku hanyar bawaan kamanakanku matan Jawa. Di banua baluman kaluar lagi,” ujar Garbus malihatakan kutak rukunya.

“Sayangnya ikam ampih baruku Lui lah jadi kada kawa umpat marasani ruku hanyar ku ini, nyaman banar, hampul,” rasa handak sambung puting,” ujar Garbus.

“Hi-ih Lui ai nyaman banar, haraganya gin kikira larang jua,” ujar Tulamak umpat manambahi.

“Kalu mancubai sabilah kada papa jua pang, sakali-kali,” ujar palui rupanya kacar jua inya lalu marabuti ka ruku garbus. Habis talu bilah inya baruku.

Kada lawas imbah itu liwatlah bini Palui. Malihat bubuhannya pina mampaul kukus ruku, bini Palui baucap: “Uuuiii ... abahnya, maka sampiyan sudah bajanji bausaha mangurangi ruku. Nyatanya di luar rumah tatap haja maisap madat itu. Ini katahuan bahwa sampiyan pangaramput,” ujar bininya.

“Laki ikam ini baruku hanyar sakali ini haja bini Palui ai, hanyar sapanggal, sabilah balum habis,” ujar Garbus mambila Palui.

“Puting ruku nang bahamburan ini siapa ampunnya? Itu nah masih bakukus, musti ampun pian jua,” ujar bini Palui manunjuk puting-puting rukuk di parak batis lakinya.

“Hi-ih, bujur aku sudah bajanji umanya ai gasan mangurangi ruku, ini nah buktinya aku kada manukar cuma maminta rukunya Garbus,” ujar Palui baulah alasan.

“Mangurangi ruku nangapa? mangurangi ruku kawal,” ujar bini Palui. “Ayulakasi kita bulikan, Pian kada bulih lagi bakakawalan lawan bubuhannya ini,” ujar bini Palui sambil manarik tangan lakinya.

Read more »